الغدر

موضوع: الغدر الأربعاء يناير 06, 2010 9:54 am

واش حكايتك يا لغدر يا لي تفرق بين لحباب

تدخل بين اللحم والظفر وتفرق من كانوا قراب

تدخل بين الناس وتخّّسر بين الخاوة وبين الصحاب

ما بينهم تزرع الشر وتخليهم يحصدوا العذاب

واش نقول أو واش نهدر وحتى نألف ألف كتاب

ما نظنّش بلي رايح نقدر نقولك كامل واش راني حاب

قلبي منك راه معمر عملتنا حاجات صعاب

لو كان ماشي ربي يستر لو كان رانا تحت التراب

لو كان الواحد راه نتاحر ولا راهو يشرب الشراب

ولا يتكيف ولا يقمر ويهلك روحو وبلا سباب

وين تحب تدخل تقدر من الشقة تاع الباب

ولا تمشي مور الظهر وما نديرولكش كامل حساب

الغدار تردو يهدر ويقول كلام بزاف شباب

والمغدور يّولي حاير بين لكذب وبين الصواب

يوّلي يشوف روحو طاير مع الحمامة فوق السحاب

ولا يشوف الورد داير ومفرّش من فوق التراب

كيفاش رايح يجيب خبر بلي بلي هاذيك لحمامة غراب

ولا كيفاش راح يفكر بلي الورد يكون كذاب

شحال من واحد خاطرو تكسر تنحرق كيما الشمعة وذاب

طول اليل بايت ساهر يبكي بالدموع هذاك ما صاب

شحال من واحد كان يفكر باش يروح ليها خطّاب

هاذاك النهار ناض وبكّر أو واش قدر كامل جاب

طريق كامل فالطفلة يشكر مع والديه ومادارش حساب

بلي الطفلة صابت واحد اخر وهو رايحين يردوه من الباب

شحال من واحد كان مقرر على يامات يكتب الكتاب

واش شرطولو كامل دبّر ويزيد من عندو يا من صاب

لما طلع نهار واحد اخر فتح الباب قّدّامو صاب

ردولو قّشّو وهو لا خبر وما سمع منهم حتى جواب

وشحال من واحدة كانت تحظّر في عرسها وعرضت لحباب

وكاين الي لحقت حتى تتصدر وعريسها نهار عرسو غاب

والناس تحكي والناس تهدر وهي تبكي وزادولها عذاب

قالك ما عندهاش الزهّر حبت واحد وخرج كذاب

وشحال من واحدة خانها الدهر بعد الزواج تبدل الحساب

لقات زوجها إنسان آخر ماشي هذاك الي جاها للباب

وشحال من واحدة زوجها يقمر ويدخل لعشيا يريح بالشراب

وهي وولادها بايتين للشر وما عندهومش باش يشرو كتاب

شحال من دار وشحال من قصر شحال من كوخ بسبابك راب

وناسوا كانوا عايشين فالستر تكشفوا وانت الي كنت سباب

شحال من بيت كان معمر كاب بناسوا مشبح وشباب

دخلت ليه رديتو يصفر او ورقة الطلاق قدام الباب

ربعة حيوط وشويا تصاور علاش تفارقوا الأم والأب

أنت السّبة يا الغدر يا لي تفرق بين لحباب

تدخل بين اللحم والظفر وتفرق من كانوا قراب

تضرب واحد بواحد اخر تخلطلهم كامل لحساب

ولما الواحد يخدع لاخر تفرح وتفوّت نهار شباب

اتفرقهم أو تطفّر خلاص درت وش كنت حاب

تروح تحوس على وحد اخر كشما تفرق زوج حباب

هاذي حكايتك يا لغدر يا لي غالط في لحساب

يالي داير روحك شاطر ونسيت بلي الله تواب

وبلي هو سبحانو يغفر لذاك الغدار ايلا تاب

أو في لحظة سبحانو يقدر يعاود يجمع زوج حباب

ويخلف شي بشي وحد اخرة ويعوض دوك ليام الصعاب

والي تنغدر عندو أجر يلقاه في يوم الحساب

أما نتايا تبقى مبّحر وغير تجري من باب لباب

حتى تلحق للباب اللخر الي هو باب لعذاب

المرجع/ قصة وقصيد

[/b]

[/color]

موضوع: رد: الغدر الخميس يناير 07, 2010 7:36 am

دوما مع روائعك اختي رحيييييييييييل
بارك الله فيك على القصيدة المميزة
والتي تعالج ظاهرة يعاني منها الاصدقاء في مجتمعنا ليس ككل طبعا
في انتظار جديدك
شكرا لك

موضوع: رد: الغدر الخميس يناير 07, 2010 12:28 pm

قصيدة في منتهى الجمال والروعة
دائما متالقة اخت رحيل
مشكورة

موضوع: رد: الغدر الأحد يناير 17, 2010 11:44 pm

بارك الله فيك على القصيدة الرااااااااااااائعة

شكرا رحيل

موضوع: رد: الغدر الأربعاء يناير 20, 2010 9:48 am

شكرا على المرور

موضوع: رد: الغدر الأحد يونيو 20, 2010 4:25 pm

شكرا لك على ذوقك وكلماتك
ممكن سءال
مالفرق بين الغدر والخداع؟

أشكرك مجددا على هذه الكلمات الجميله الرائعه المبدعه ...أشكر علي رقي انسانيتك واحساسك المرهف فكلماتك وسام اعتز به

موضوع: رد: الغدر السبت يونيو 04, 2011 3:50 am

oui ta raison fi kol kelma ktebtiha rabi yahafdhak nchalah